અમદાવાદ: મલ્ટીપલ ક્લસ્ટર ટ્રેડિંગ દ્વારા ઉંચા નફાનું વચન આપીને ઓનલાઈન રૂ. 1.84 કરોડની છેતરપિંડી કરવાના કેસમાં પોલીસે વધુ એક શખ્સની ધરપકડ કરી છે. તે છેતરપિંડી કરનાર ગેંગનો મુખ્ય એજન્ટ છે. અમદાવાદ સાયબર ક્રાઈમ બ્રાન્ચની ટીમે મધ્યપ્રદેશના ભોપાલમાં તેની ધરપકડ કરી હતી. આ કેસમાં અન્ય ચાર શંકાસ્પદોની ધરપકડ કરવામાં આવી હતી. આરોપીનું નામ નીરજ યાદવ છે. તે ભોપાલમાં ઈદગાહ હિલ્સ પાસે ગોયલ એપાર્ટમેન્ટમાં રહે છે. મૂળ વિદિશા જિલ્લાના બાસોદા તહસીલના રામનગર વોર્ડ નંબર 1 નો રહેવાસી છે. તેણે ઇલેક્ટ્રિકલ એન્જિનિયરિંગનો અભ્યાસ કર્યો હતો.
ચીની સાયબર છેતરપિંડી ગેંગ માટે ગેટકીપર
આરોપી નીરજ દોઢ વર્ષથી એક આંતરરાષ્ટ્રીય ચીની સાયબર-ઠગ ગેંગના સંપર્કમાં છે. તેણે શરૂઆતમાં ટેલિગ્રામ યુઝર ડીબડીને ગેમિંગ એપ માટે પોતાનું બેંક એકાઉન્ટ આપ્યું હતું, જેનાથી તે નોંધપાત્ર કમિશન મેળવતો હતો. લોભી થઈને તે ગેંગમાં જોડાયો હતો. તે ભારતમાં એક ચીની ગેંગ માટે ગેટકીપર તરીકે કામ કરતો હતો. તે દોઢ વર્ષમાં કમિશનમાં 68 લાખ રૂપિયા કમાયો હતો.
છેતરપિંડીની રકમમાંથી ભાવનાના ખાતામાં 42 લાખ રૂપિયા જમા કરવામાં આવ્યાં હતા
થોડા દિવસો પહેલા સાયબર ક્રાઈમ બ્રાન્ચે આ કેસમાં ચાર આરોપીઓની ધરપકડ કરી હતી. તેમાં જૂનાગઢની રહેવાસી ભાવના માણેક, રાજકોટના રહેવાસી દીપક ગંગદેવ, ધરમિક લાડવા અને અંકિત પોંકિયાનો સમાવેશ થાય છે. 1.84 કરોડ રૂપિયાની છેતરપિંડીમાંથી 42.50 લાખ રૂપિયા ભાવનાના બેંક ખાતામાં, જલારામ ટ્રેડર્સમાં જમા કરવામાં આવ્યાં હતા. તેને આ ખાતાની વિગતો દીપક ગંગદેવને આપી હતી, તેણે પછી તે ધરમિક લાડવાને આપી અને ધરમિકે તે અંકિત સાથે શેર કરી હતી.
અંકિત નીરજના સંપર્કમાં હતો. તેણે ધરમિકને મળવાની વ્યવસ્થા કરી. નીરજે ધરમિકને બેંકની કીટ સાથે પુણે બોલાવ્યો. તે ચારથી પાંચ દિવસ એક હોટલમાં રહ્યો અને કીટ લીધી. લગભગ 15 દિવસમાં, આ ખાતામાં રૂ. 3.17 કરોડ જમા થઈ ગયા, જેમાં આ રૂ,42.50 લાખનો પણ સમાવેશ થાય છે. નીરજ બેંક ખાતા આપનારાઓને પાંચ ટકા કમિશન આપતો હતો.
14 બેંક ખાતાઓ સામે 364 ફરિયાદો
સાયબર ક્રાઇમ બ્રાન્ચના પીઆઈ અને તપાસ અધિકારીએ જણાવ્યું કે નીરજની પૂછપરછમાં 14 બેંક ખાતા મળ્યાં છે. તેની સામે સાયબર ક્રાઇમ અને છેતરપિંડીની 364 ફરિયાદો દાખલ કરવામાં આવી છે. તે પુણે, ભોપાલ અને ઇન્દોરની હોટલોમાં ખાતાધારકોને સાથે રાખતો હતો.
Android મોબાઇલ માટેઃ https://play.google.com/store/
iOS મોબાઇલ માટેઃ https://apps.apple.com/in/app/
