નવી દિલ્હીઃ દેશમાં વૈશ્વિક ક્રૂડ ઓઈલની કિંમતોમાં વધારાને પગલે સોમવારે ફરી એકવાર પેટ્રોલ અને ડીઝલના ભાવમાં મોટો વધારો ઝીંકાયો થયો છે. સોમવારે પેટ્રોલમાં રૂ. 2.61 અને ડીઝલમાં રૂ. 2.71 પ્રતિ લિટરનો તોતિંગ વધારો થયો હતો. આ ભાવવધારાની સાથે જ હવે દેશમાં રાજકીય ગરમાવો આવી ગયો છે. તો ભાજપે ભાવવધારા મુદ્દે કોંગ્રેસ શાસિત રાજ્યો પર આકરા પ્રહારો કર્યા છે.
ઈંધણના ભાવ વધતાની સાથે જ ભારતીય જનતા પાર્ટીએ કોંગ્રેસને ઘેરી છે. ભાજપનો દાવો છે કે દેશના તમામ રાજ્યોમાં કેન્દ્રીય આબકારી જકાત એક સમાન હોવા છતાં, કોંગ્રેસ શાસિત રાજ્યોમાં ભાજપ શાસિત રાજ્યો કરતાં મોંઘું પેટ્રોલ-ડીઝલ વેચાઈ રહ્યું છે.
ભાજપ શાસિત રાજ્યો દિલ્હીમાં પેટ્રોલ રૂ. 102 અને ગુજરાતમાં રૂ. 101 પ્રતિ લિટર છે. જ્યારે કોંગ્રેસ- વિપક્ષ શાસિત રાજ્યો તેલંગાણામાં રૂ.118, કેરલમમાં રૂ. 114 અને કર્ણાટકમાં રૂ. 110 પ્રતિ લિટર પેટ્રોલ છે.
ભાજપે આરોપ લગાવ્યો છે કે જે કોંગ્રેસ કેન્દ્ર સરકારને મોંઘવારી પર ઉપદેશ આપે છે, તે પોતે જ પોતાના રાજ્યના લોકો પર લિટરે 16 રૂપિયા વધુ ટેક્સ લગાવી રહી છે. ભાજપે રાહુલ ગાંધીના નેતૃત્વવાળી કોંગ્રેસને દંભી ગણાવી છે.
સોમવારના વધારા બાદ દેશના 13 રાજ્યોમાં પેટ્રોલની કિંમત રૂ. 110 પ્રતિ લિટરથી વધુ થઈ ગઈ છે. રસપ્રદ વાત એ છે કે આ 13 રાજ્યોમાંથી 9 રાજ્યોમાં ભાજપ અથવા NDA ગઠબંધનની સરકાર છે. જ્યારે 4 રાજ્યોમાં કોંગ્રેસ કે તેના ગઠબંધનની સરકાર છે. આંદામાન અને નિકોબાર, અરૂણાચલ પ્રદેશ, દાદરા અને નગર હવેલી તેમજ દમણ-દીવમાં પેટ્રોલની કિંમત હજુ પણ રૂ. 100થી ઓછી છે.
