વોંશિગ્ટનઃ અમેરિકાના રાષ્ટ્રપતિ ડોનાલ્ડ ટ્રમ્પે બુધવારે રશિયા પાસેથી તેલ ખરીદવાનું ચાલુ રાખવા બદલ ભારત પર 25 ટકાનો વધારાનો ટેરિફ લાદવાના એક્ઝિક્યુટિવ ઓર્ડર પર હસ્તાક્ષર કર્યા હતા. આ સાથે અમેરિકામાં ભારતીય ઉત્પાદનો પરનો ટેરિફ હવે વધીને 50 ટકા થઈ ગયો છે. આ પગલાથી કાપડ, દરિયાઈ ઉત્પાદનો અને ચામડાની નિકાસ જેવા ક્ષેત્રો પર મોટી અસર થશે. સામે ભારતે કહ્યું કે આ પગલાં અયોગ્ય અને ગેરવાજબી છે. બુધવારે ભારત પર 25 ટકાનો વધારાનો ટેરિફ લાદ્યા પછી ટ્રમ્પે કહ્યું કે તેઓ હજુ બીજા ગૌણ પ્રતિબંધો પણ લાદશે.
અમેરિકા હવે ભારતીય માલ પર 50 ટકા ટેરિફ લગાવશે
વિદેશ મંત્રાલયે એક નિવેદનમાં કહ્યું કે અમેરિકાએ ભારત પર વધારાની ટેરિફ લાદવાનો નિર્ણય લીધો છે તે અત્યંત દુર્ભાગ્યપૂર્ણ છે. ભારત તેના રાષ્ટ્રીય હિતોનું રક્ષણ કરવા માટે તમામ જરૂરી પગલાં લેશે. ટ્રમ્પે ગયા અઠવાડિયે ભારત પર 25 ટકા ટેરિફની જાહેરાત કરી હતી. આ સાથે તેમણે એમ પણ કહ્યું હતું કે રશિયા સાથે વેપાર કરવા બદલ ભારતને અલગથી દંડ કરવામાં આવશે. ત્યારબાદ તેમણે બુધવારે ભારત પર વધારાના 25 ટકા ટેરિફની જાહેરાત કરી. આ આદેશ પછી કેટલીક રાહતવાળી વસ્તુઓ સિવાય ભારતીય માલ પર કુલ ટેરિફ 50 ટકા થશે.
ટ્રમ્પ ભારત પર ઘણા ગૌણ પ્રતિબંધો લાદશે
ટ્રમ્પ ભારત અને રશિયા વચ્ચે ચાલી રહેલા તેલ અને લશ્કરી વેપારથી હતાશ છે અને પોતાની સત્તાનો દુરુપયોગ કરીને ભારતને દબાવવાનો શ્રેષ્ઠ પ્રયાસ કરી રહ્યાં છે. પરંતુ ભારતે એ પણ સ્પષ્ટ કરી દીધું છે કે તે ટ્રમ્પના નિર્ણયો સામે ઝૂકશે નહીં. ટ્રમ્પે કહ્યું કે તમને ઘણા ગૌણ પ્રતિબંધો જોવા મળશે. તેનો સીધો અર્થ એ છે કે ટ્રમ્પ ભારત પર 50 ટકા ટેરિફ લાદ્યા પછી પણ સંપૂર્ણપણે ખુશ નથી અને તેઓ હવે ભારત પર ઘણા ગૌણ પ્રતિબંધો લાદવાની તૈયારી કરી રહ્યાં છે. ગૌણ પ્રતિબંધ એ એવા દેશ (ભારત) પર લાદવામાં આવેલ આર્થિક પ્રતિબંધ છે જે એવા દેશ (રશિયા) સાથે વેપાર કરે છે જેના પર પહેલાથી જ પ્રાથમિક પ્રતિબંધો લાગુ થઈ ચૂક્યા છે.
પ્રારંભિક ટેરિફ 7 ઓગસ્ટથી અમલમાં આવશે
બુધવારે ભારત પર વધારાના 25 ટકા ટેરિફની જાહેરાત કરતા આદેશમાં કહેવામાં આવ્યું છે કે, આયાત પર લાગુ થતા અન્ય કોઈ પણ ટેરિફ, ફી, કર, વસુલી અને ચાર્જ ઉપરાંત હશે. પ્રારંભિક ટેરિફ 7 ઓગસ્ટથી લાગુ થશે, જ્યારે વધારાના ટેરિફ 21 દિવસ પછી લાગુ થશે. ટ્રમ્પે મંગળવારે ચેતવણી આપી હતી કે તેઓ રશિયા પાસેથી તેલ અને ગેસ ખરીદવા બદલ 24 કલાકની અંદર ભારત પર ભારે ટેરિફની જાહેરાત કરશે.
Android મોબાઇલ માટેઃ https://play.google.com/store/apps/details?id=com.gujaratpost.app
iOS મોબાઇલ માટેઃ https://apps.apple.com/in/app/gujarat-post/id6475000526+++