અમદાવાદઃ ચાણક્યપુરીની શિવમ આર્કેડ સોસાયટીની બહાર મોડી રાત્રે હાથમાં તલવારો સાથે અસામાજિક તત્વોએ હંગામો મચાવ્યો હતો. સ્થાનિક લોકોના જણાવ્યાં અનુસાર સોસાયટીના મકાન નંબર B-205માં દારૂની મહેફિલ ચાલી રહી હતી. જ્યારે લોકોએ તેને રોકવાનો પ્રયાસ કર્યો ત્યારે ચાર-પાંચ લોકોએ હોબાળો મચાવ્યો હતો.
પોલીસના જણાવ્યાં અનુસાર, સ્થાનિક લોકોનું કહેવું છે કે આરોપીઓ ભાડાના મકાનમાં દારૂની મહેફિલ માણતા હતા. જ્યારે એક શખ્સ નીચે આવ્યો ત્યારે તેણે સોસાયટીના લોકો સાથે ગેરવર્તણૂક કરી હતી, તેને અટકાવવામાં આવતા મામલો વધુ વણસી ગયો હતો. આરોપી બોલેરો કાર લઈને સોસાયટીમાં આવ્યો હતો.
પહેલા ભાગી ગયો અને પછી વધુ લોકો સાથે પાછો ફર્યો
હંગામો શરૂ થયા બાદ શરૂઆતમાં 3 લોકો ત્યાંથી ભાગી ગયા હતા અને થોડીવારમાં વધારે લોકો તલવારો સહિતના ઘાતક હથિયારો સાથે સોસાયટીમાં પહોંચી ગયા હતા. આ પછી આરોપીઓએ હોબાળો મચાવ્યો હતો. અસામાજિક તત્વોને હંગામો મચાવતા જોઈને સિક્યુરિટી સ્ટાફે સોસાયટીનો ગેટ બંધ કરી દીધો હતો.
ઘરમાં તપાસ કરતાં દારૂની બોટલો મળી આવી હતી
આ ઘટનામાં સોસાયટીના 2-3 લોકો ઘાયલ થયા હતા, જેમને પ્રાથમિક સારવાર આપવામાં આવી હતી. સોસાયટીમાં હંગામો મચાવતા લોકો છેલ્લા 3 દિવસથી સોસાયટીમાં પોતાનો સામાન લાવી રહ્યાં હતા. આરોપીએ ત્રણ દિવસ પહેલા જ ભાડા પર મકાન લીધું હતું. માહિતી મળતાં પોલીસ પહોંચી હતી અને બંધ મકાનનું તાળું ખોલ્યું તો અંદરથી દારૂની બોટલો મળી આવી હતી.
15 હુમલાખોરો સામે ફરિયાદ નોંધાઈ
હુમલો કરનારા તમામ લોકો અમદાવાદના ઘાટલોડિયાના રહેવાસી હતા. સોસાયટીના સીસીટીવી ફૂટેજ મેળવ્યાં બાદ પોલીસે 15 હુમલાખોરો સામે હત્યાના પ્રયાસ અને તોફાનોની ફરિયાદ નોંધી છે.
અમારી મોબાઇલ એપ ડાઉનલોડ કરોઃ
Android મોબાઇલ માટેઃ https://play.google.com/store/apps/details?id=com.gujaratpost.app
iOS મોબાઇલ માટેઃ https://apps.apple.com/in/app/gujarat-post/id6475000526