સુરતમાં કામુકતા બની કાળ, સેક્સવર્ધક ગોળીઓ ખાઈને પત્ની પર અત્યાચાર ગુજારતા પતિની પત્નીએ જ કરી હત્યા

• પત્નીએ હળદરવાળા દૂધમાં ભેળવ્યું હતું ઝેર
• પતિ સેક્સવર્ધક ગોળીઓ ખાઈને પત્ની સાથે ખૂબ જ ક્રૂરતા કરતો

સુરતઃ શહેરમાં ગુનાખોરીનો ગ્રાફ દિવસેને દિવસે વધી રહ્યો છે. હવે નવી એક ચોંકાવનારી ઘટના સામે આવી છે. સેક્સવર્ધક ગોળીઓ ખાઈ પત્ની પર અત્યાચાર ગુજારતા પતિની પત્નીએ જ ક્રૂર હત્યા કરી હતી.

લિંબાયત વિસ્તારમાં એક પત્નીએ પોતાના પતિની ઝેર આપીને હત્યા કરી નાખી. આ પાછળનું કારણ જાણીને પોલીસ પણ ચોંકી ઉઠી હતી. મૃતક હૈદરઅલી મુંબઈમાં કામ કરતો હતો. તે જ્યારે પણ સુરત ઘરે આવતો હતો, ત્યારે સેક્સવર્ધક ગોળીઓ ખાઈને પત્ની સાથે ખૂબ જ ક્રૂરતા કરતો હતો. પત્નીના જણાવ્યાં મુજબ, તે તેને એટલી હદે મારતો કે શરીરમાંથી લોહી નીકળવા લાગતું હતું.

પતિના આ શારીરિક અને માનસિક ત્રાસથી કંટાળીને પત્ની ઈશરત જહાને તેને પતાવી દેવાનું નક્કી કર્યું હતું.  જે અંતર્ગત 1 જાન્યુઆરીએ પત્નીએ પતિને હળદરવાળું દૂધ આપ્યું હતું, જેમાં તેણે ઉંદર મારવાની દવા (ઝેર) ભેળવી દીધી હતી. ઝેરની ધીમી અસરને કારણે 5 જાન્યુઆરીએ પતિની તબિયત બગડી અને હોસ્પિટલમાં તેનું મોત થયું હતું.

શરૂઆતમાં પત્નીએ આ કુદરતી મોત હોવાનું નાટક કર્યું હતું. પરંતુ પતિના મોતના થોડા સમય પછી જ્યારે દફનવિધિ  માટે પત્ની અને તેના જેઠ વચ્ચે ઝઘડો થયો, ત્યારે મામલો પોલીસ સુધી પહોંચ્યો હતો. પોલીસે જ્યારે કડકાઈથી પૂછપરછ કરી ત્યારે પત્નીએ કબૂલ કર્યું હતું કે  તેણે જ પતિને ઝેર આપી અને ગળું દબાવીને મારી નાખ્યો હતો.