અમદાવાદઃ ગુજરાત હાઈકોર્ટે પોપટ લાખા સોરઠિયા હત્યા કેસમાં રીબડાના અનિરૂદ્ધસિંહ જાડેજાને આપેલી સજા માફી રદ કરી હતી. હાઈકોર્ટે તેમને એક મહિનાની અંદર જેલમાં હાજર થવાનો આદેશ આપ્યો છે. આ નિર્ણયને કારણે વર્ષ 2018થી ખોટી રીતે જેલની બહાર આવેલા અનિરૂદ્ધસિંહને ફરીથી આજીવન કેદની સજા ભોગવવી પડશે.
ઘટના શું હતી ?
15 ઓગસ્ટ, 1988ના રોજ ગોંડલની સંગ્રામસિંહજી હાઈસ્કૂલના મેદાનમાં ધ્વજવંદનના કાર્યક્રમ દરમિયાન કોંગ્રેસના ધારાસભ્ય પોપટ લાખા સોરઠિયાની ગોળી મારીને હત્યા કરવામાં આવી હતી. આ કેસમાં સુપ્રીમ કોર્ટે અનિરૂદ્ધસિંહને આજીવન કેદની સજા ફટકારી હતી. જોકે,2018માં તેમને જેલવડા (જેલ સત્તાવાળાઓ) દ્વારા ખોટી રીતે સજા માફી આપી દેવામાં આવી હતી.
અનિરૂદ્ધસિંહ પાસે હવે શું વિકલ્પો છે ?
હાઈકોર્ટના આદેશ બાદ અનિરૂદ્ધસિંહ જાડેજા પાસે બે રસ્તા છે. પ્રથમ તેઓ હાઈકોર્ટના નિર્ણયને સુપ્રીમ કોર્ટમાં પડકારી શકે છે. જોકે, કાયદાના નિષ્ણાતોનું માનવું છે કે આ રસ્તો મુશ્કેલ છે, કારણ કે સુપ્રીમ કોર્ટને સજા માફી વિશે જાણ કરવામાં આવી ન હતી. બીજો વિકલ્પ તેઓ જેલમાં હાજર થઈને ફરીથી સજા માફી માટે ગુજરાત સરકારને અરજી કરી શકે છે. જોકે, આ પણ મુશ્કેલ છે કારણ કે તેમનું ચકચારી અમિત ખૂંટ આપઘાત કેસમાં પણ નામ છે.
જો અનિરૂદ્ધસિંહ એક મહિનામાં હાજર નહીં થાય તો શું થશે ?
જો અનિરૂદ્ધસિંહ એક મહિનાની અંદર જેલમાં હાજર નહીં થાય, તો તેમને ભાગેડુ જાહેર કરી તેમની મિલકત અને બેંક ખાતા જપ્ત કરવામાં આવશે. આ ઉપરાંત, હાઈકોર્ટે તેમને ચાર અઠવાડિયા સુધી દર અઠવાડિયે પોલીસ સ્ટેશનમાં હાજરી આપવા, પાસપોર્ટ જમા કરાવવા અને સોગંદનામું કરવા માટે પણ જણાવ્યું છે.
Android મોબાઇલ માટેઃ https://play.google.com/store/
iOS મોબાઇલ માટેઃ https://apps.apple.com/in/app/
