ઇસ્લામાબાદઃ પહેલગામ આતંકવાદી હુમલાના બદલામાં ભારતે ઓપરેશન સિંદૂર હેઠળ પાકિસ્તાનમાં અનેક સ્થળોએ હવાઈ હુમલા કર્યા હતા, જેમાં જૈશ, લશ્કર અને હિઝબુલ મુજાહિદ્દીનના આતંકવાદી છાવણીઓનો નાશ કરવામાં આવ્યો હતો. ભારતે સ્પષ્ટતા કરી હતી કે તેમને ફક્ત આતંકવાદી કેમ્પોને નિશાન બનાવ્યાં હતા. પાકિસ્તાની લશ્કરી મથકો કે રહેણાંક વિસ્તારોને નિશાન બનાવ્યાં ન હતા. પાકિસ્તાન પર નિર્ભર છે કે તે તણાવ વધારવા માંગે છે કે શાંતિનો માર્ગ અપનાવે છે. તેમને તણાવ વધારવાનો પ્રયાસ કર્યો અને ડ્રોન અને મિસાઇલોથી ભારતીય લશ્કરી સ્થાપનો અને રહેણાંક વિસ્તારોને નિશાન બનાવ્યાં છે. જો કે, ભારતના મજબૂત હવાઈ સંરક્ષણ દ્વારા પાકિસ્તાની હુમલાને હવામાં જ નિષ્ફળ બનાવવામાં આવ્યો હતો.
જ્યારે ભારતીય દળોએ આ ઉશ્કેરણીનો જવાબ આપવાનું શરૂ કર્યું, ત્યારે પાકિસ્તાનના પાયા હચમચી ગયા હતા. હવે ત્યાંના વિદેશ મંત્રી કહે છે કે પાકિસ્તાન યુદ્ધ નહીં પણ શાંતિ ઇચ્છે છે. સ્થાનિક ન્યૂઝ ચેનલ જીઓ ટીવી સાથે વાત કરતા પાકિસ્તાનના નાયબ વડાપ્રધાન અને વિદેશ પ્રધાન ઇશાક ડારે કહ્યું કે જો ભારત આક્રમકતા નહીં બતાવે અને હુમલાઓ બંધ ન કરે, તો અમે પણ તણાવ ઓછો કરવા માંગીએ છીએ. પાકિસ્તાન હંમેશા શાંતિ ઇચ્છતું રહ્યું છે અને જો ભારત આ સમયે અટકશે તો અમે પણ શાંતિનો વિચાર કરીશું અને બદલો લઈશું નહીં કે કંઈ કરીશું નહીં.
આપણે ખરેખર શાંતિ ઇચ્છીએ છીએ, કારણ કે આપણો ઉદ્દેશ વિનાશ અને પૈસાનો બગાડ નથી. પાકિસ્તાને આ તણાવ ઘટાડવા માટે વિવિધ દેશો સાથે સંપર્કો સ્થાપિત કર્યા છે. પાકિસ્તાને અમેરિકાના વિદેશ મંત્રી માર્કો રુબિયોને કહ્યું છે કે તણાવ ઓછો કરવાની જવાબદારી ભારતની છે. ભારતીય સેનાના ઓપરેશન સિંદૂર સામે, પાકિસ્તાની સેનાએ ઓપરેશન બુન્યાન-અન-મર્સૂસ શરૂ કર્યું હતું, જેને ભારતે થોડા કલાકોમાં જ નિષ્ફળ બનાવી દીધો. પોતાના ઓપરેશન હેઠળ, પાકિસ્તાને ભારતના ઉધમપુર, પઠાણકોટ, ભટિંડા અને ભૂજ વાયુસેના સ્ટેશનોને નિશાન બનાવ્યા હતા, પરંતુ તેની મિસાઇલો ભારતીય વાયુસેનાની હવાઈ સંરક્ષણ પ્રણાલીમાં પ્રવેશ કરવામાં નિષ્ફળ ગઈ હતી. આ હુમલાઓ માટે પાકિસ્તાને તેની હાઇ સ્પીડ મિસાઇલોનો ઉપયોગ કર્યો હતો.
જેને ભારતના હવાઈ સંરક્ષણ દ્વારા હવામાં જ નષ્ટ કરવામાં આવ્યાં હતા. આ હુમલાઓથી ભારતીય વાયુસેનાના મથકોને મર્યાદિત નુકસાન થયું છે. જવાબમાં ભારતે રફીકી, મુરીદ, ચકલાલા, રહીમ યાર ખાન, સુક્કુર અને ચુનિયા એરબેઝ સહિત છ પાકિસ્તાની સૈન્ય મથકો પર હુમલો કર્યો હતો. ભારતીય હુમલામાં પાકિસ્તાનના રફીકી, મુરીદ, ચકલાલા અને રહીમ યાર ખાન એરબેઝને વ્યાપક નુકસાન થયું છે.
આ સમયગાળા દરમિયાન, ભારતીય સેનાએ નાગરિકો અને માળખાઓને કોઈ નુકસાન ન થાય તેની સંપૂર્ણ કાળજી લીધી હતી. પ્રેસ કોન્ફરન્સમાં ભારતીય સંરક્ષણ મંત્રાલયે માહિતી આપી કે અમારી જવાબી કાર્યવાહીમાં પાકિસ્તાનને ગંભીર લશ્કરી નુકસાન થયું છે. ભારતીય વાયુસેનાના લડાકુ વિમાનોએ તેમના સચોટ હુમલાઓમાં પાકિસ્તાનના ટેકનિકલ સ્થાપનો, કમાન્ડ અને કંટ્રોલ સેન્ટરો, રડાર સાઇટ્સ અને શસ્ત્રોના સંગ્રહનો નાશ કર્યો છે. આ હુમલાઓ પછી પાકિસ્તાનને ખ્યાલ આવી ગયો છે કે ત્રણેય ભારતીય સેનાઓ અને તેમના શસ્ત્રોની પહોંચ તેના પ્રદેશમાં ખૂબ જ ફેલાયેલી છે. એટલા માટે ઇશાક ડાર હવે તણાવ ઓછો કરવા વિનંતી કરી રહ્યાં છે.
Android મોબાઇલ માટેઃ https://play.google.com/store/
iOS મોબાઇલ માટેઃ https://apps.apple.com/in/app/
