કચ્છઃ ભારત-પાકિસ્તાન સરહદ પર વધી રહેલા તણાવ વચ્ચે કચ્છ જિલ્લાના વહીવટીતંત્રે એક એડવાઇઝરી જારી કરી છે. નાગરિકોને તેમના ઘરોમાં સુરક્ષિત રહેવા અને અફવાઓથી બચવા માટે કહેવામાં આવ્યું છે. શુક્રવારે રાત્રે પાકિસ્તાની ડ્રોન હુમલાના પ્રયાસને નિષ્ફળ બનાવ્યાં બાદ અને ત્રણ જિલ્લાઓમાં બ્લેકઆઉટ લાદવામાં આવ્યાં બાદ આ સલાહ જારી કરવામાં આવી હતી.
કચ્છના કલેક્ટર ઓફિસે સવારે X પર એક પોસ્ટમાં લખ્યું - બધા નાગરિકો તેમના ઘરોમાં સુરક્ષિત રહો. કોઈ પણ કારણ વગર બહાર ન નીકળો અને કોઈ પણ અફવાઓ પર ધ્યાન ન આપો. ગભરાશો નહીં. સેનાના અધિકારીઓએ જણાવ્યું હતું કે શુક્રવારે રાત્રે ભારત-પાકિસ્તાન સરહદ અને નિયંત્રણ રેખા (LoC) નજીક 26 સ્થળોએ પાકિસ્તાની ડ્રોન જોવા મળ્યા હતા, જેમાંથી એક મુખ્ય સ્થળ ભૂજ જિલ્લા મુખ્યાલય હતું.
શુક્રવાર રાતથી કચ્છ તેમજ બનાસકાંઠા અને પાટણના કેટલાક સરહદી વિસ્તારોમાં વીજ પુરવઠો બંધ થઈ ગયો છે. પાટણના સાંતલપુર તાલુકાને અડીને આવેલા ગામડાઓમાં પણ બ્લેકઆઉટ લાદવામાં આવ્યું છે, જેથી કોઈપણ શંકાસ્પદ ગતિવિધિ પર સરળતાથી નજર રાખી શકાય.
મુખ્યમંત્રી ભૂપેન્દ્ર પટેલે શુક્રવારે ગાંધીનગરમાં સેના અને અર્ધલશ્કરી દળોના વરિષ્ઠ અધિકારીઓ સાથે બેઠક યોજી હતી. આ બેઠકનો ઉદ્દેશ વિવિધ સરકારી વિભાગો અને સુરક્ષા દળો વચ્ચે વધુ સારો સંકલન સ્થાપિત કરવાનો હતો. ગૃહ રાજ્યમંત્રી હર્ષ સંઘવીએ જણાવ્યું કે પોલીસ, જિલ્લા મેજિસ્ટ્રેટ, સેના, નૌકાદળ, વાયુસેના, બીએસએફ અને કોસ્ટ ગાર્ડના અધિકારીઓએ બેઠકમાં હાજરી આપી હતી.
નોંધનીય છે કે 7 મેના રોજ ભારતીય સેનાએ પાકિસ્તાન અને પાકિસ્તાન અધિકૃત કાશ્મીર (POK) માં 9 આતંકવાદી ઠેકાણાઓ પર મિસાઈલ હુમલા કર્યા હતા. જેમાં બહાવલપુરમાં જૈશ-એ-મોહમ્મદ અને મુરીદકેમાં લશ્કર-એ-તૈયબાના ઠેકાણાઓનો સમાવેશ થાય છે. આ કાર્યવાહી 22 એપ્રિલના રોજ પહેલગામમાં થયેલા આતંકવાદી હુમલાના જવાબમાં કરવામાં આવી હતી, જેમાં સૈન્ય અધિકારી અને નાગરિકો માર્યા ગયા હતા.
Android મોબાઇલ માટેઃ https://play.google.com/store/apps/details?id=com.gujaratpost.app
iOS મોબાઇલ માટેઃ https://apps.apple.com/in/app/gujarat-post/id6475000526+++