દ્વારકાઃ ખંભાળિયા તાલુકાના દાત્રાણા ગામમા એક શ્રમિક પરિવારના 3 માસૂમ બાળકો તળાવમાં ડૂબી જતા શોકનો માહોલ છવાઈ ગયો છે. ગામના ખારાવાળી વિસ્તારમાં આવેલ તળાવ પાસે રમતા રમતા બાળકો અચાનક પાણીમાં ખાબક્યા હતા. તેમના માતા-પિતા ખેતરમાં કામ કરી હતા, તે સમયે જ તેમના ત્રણ સંતાનો રમતા-રમતા નજીકમાં જ આવેલા પાણી ભરેલા તળાવ પાસે પહોંચી ગયા હતા અને અચાનક પાણીમાં ગરકાવ થઈ ગયા હતા. તેમને જાણ થતા ઘટનાસ્થળ પર પહોંચી ગયા હતા.
આ દુર્ઘટનામાં 7 વર્ષીય બાળકી વૈશાલી અને 4 વર્ષીય બાળક વિકેશનું ઘટનાસ્થળ જ મોત થયું છે. જ્યારે દોઢ વર્ષની બાળકીની હાલત ગંભીર હોવાથી તેને તાત્કાલિક સારવાર માટે નજીકની હોસ્પિટલમાં ખસેડવામાં આવી છે. હાલ તેની સ્થિતિ નાજુક છે.
ઘટનાની જાણ થતાં જ ગામલોકો તાત્કાલિક તળાવ પાસે પહોંચીને બચાવ કામગીરી હાથ ધરી હતી. પરંતુ બે બાળકોને બચાવી શકાયા નહોતા. શ્રમિક પરિવાર એક સાથે બે સંતાનો ગુમાવતા દુઃખનો પહાડ તૂટી પડ્યો હતો.
