વડોદરાઃ એક પિકઅપ વાનનું ટાયર ફાટવાને કારણે સ્ટેયરિંગ પરથી કાબૂ ગુમાવતા આ અકસ્માત સર્જાયો હતો. અકસ્માતમાં ત્રણ બાળકો સહિત ચાર લોકોનાં મોત થયા છે, જ્યારે 8 લોકો ઘાયલ થતા સારવાર અર્થે હોસ્પિટલમાં ખસેડાયા હતા. આ અકસ્માત રાજ્ય હાઈવે પર કોટંબી ગામ પાસે બની હતી. આ ઘટનાની જાણ થતા પોલીસે સ્થળ પર પહોંચીને બચાવ કામગીરી હાથધરી હતી.
જરોદ પોલીસના જણાવ્યાં અનુસાર પીકઅપ વાન મધ્ય પ્રદેશથી મજૂરોને લઈને વડોદરા જઈ રહી હતી. આ અકસ્માત વડોદરા-હાલોલ રોડ પર કોટંબી ગામ પાસે થયો હતો. જ્યાં પિકઅપ વાનના પાછળનું ટાયર ફાટ્યું હતું, ત્યારબાદ વાન રસ્તાની બાજુના નાળામાં પડી હતી. ત્રણ બાળકો અને 35 વર્ષના એક વ્યક્તિ સહિત કુલ ચાર લોકોના ઘટનાસ્થળે જ મોત થયા હતા. અકસ્માતમાં ઘાયલ 8 લોકોને વડોદરાની સરકારી હોસ્પિટલમાં દાખલ કરવામાં આવ્યાં છે.
મૃતકોમાં માધુભાઇ મંજીભાઇ ડામોર (ઉ.વ-35), પંકજ માધુભાઇ ડામોર (ઉ.વ-9), મહિતા માધુભાઇ ડામોર (ઉ.વ-7), પ્રવિણ માધુભાઇ ડામોર (ઉ.વ-5) નો સમાવેશ થાય છે. એક જ પરિવારના 4 લોકોના કમકમાટીભર્યા મોતથી માતમ છવાયો છે.
અમારી મોબાઇલ એપ ડાઉનલોડ કરોઃ
Android મોબાઇલ માટેઃ https://play.google.com/store/
iOS મોબાઇલ માટેઃ https://apps.apple.com/in/app/
