મુંબઇઃ ભારતીય મહિલા ક્રિકેટ ટીમે ફાઇનલ મેચમાં દક્ષિણ આફ્રિકાને 52 રને હરાવીને પ્રથમ વખત ICC ODI વર્લ્ડ કપ 2025 ટ્રોફી જીતી છે. નવી મુંબઈમાં ડીવાય પાટિલ સ્પોર્ટ્સ એકેડેમી ખાતે રમાયેલી ટાઇટલ મેચમાં ટીમ ઇન્ડિયાએ પ્રથમ બેટિંગ કરતા 50 ઓવરમાં 298 રન બનાવ્યાં હતા, ત્યાર બાદ દક્ષિણ આફ્રિકાની ટીમ ફાઇનલ મેચમાં 246 રન સુધી મર્યાદિત રહી હતી.
ટીમ ઇન્ડિયાએ ઇનામી રકમ તરીકે પણ મોટી રકમ જીતી છે. જેમાં તેમને વિજેતા તરીકે ICC તરફથી કુલ 41.77 કરોડ રૂપિયા મળશે.દક્ષિણ આફ્રિકા, રનર્સ-અપ તરીકે કુલ રૂ. 21.88 કરોડ રૂપિયા મળશે.
ફાઇનલમાં શેફાલી અને દીપ્તિએ બેટ અને બોલ બંને સાથે શાનદાર પ્રદર્શન કર્યું
શેફાલી વર્મા અને દીપ્તિ શર્માએ બેટ અને બોલ બંને સાથે શાનદાર પ્રદર્શન કરીને ભારતને દક્ષિણ આફ્રિકા સામે ફાઇનલ જીતવામાં મદદ કરી હતી. જેમાં શેફાલી વર્માએ બેટિંગમાં 87 રનની ઇનિંગ રમી, ત્યાર બાદ બોલિંગમાં 7 ઓવરમાં 36 રન આપ્યાં અને 2 વિકેટ પણ પોતાના નામે કરી. દીપ્તિ શર્માએ આ ટુર્નામેન્ટમાં શાનદાર ઓલરાઉન્ડ રમત રમી રહી હતી, તો તેણે ફાઇનલ મેચમાં પણ આ જ રમત ચાલુ રાખી. ફાઇનલ મેચમાં દીપ્તિએ બેટિંગમાં 58 રનની શાનદાર ઇનિંગ રમી હતી, જ્યારે બોલિંગ કરતી વખતે તેણે 9.3 ઓવરમાં માત્ર 39 રન આપીને 5 વિકેટ પણ લીધી હતી.
દીપ્તિ શર્મા આ સિદ્ધિ મેળવનાર પ્રથમ મહિલા ખેલાડી બની
ટીમ ઈન્ડિયાની સ્ટાર ઓલરાઉન્ડર દીપ્તિ શર્માએ દક્ષિણ આફ્રિકા સામેની ODI વર્લ્ડ કપ ફાઇનલમાં 5 વિકેટ ઝડપી હતી. તે મહિલા ODI વર્લ્ડ કપના ઇતિહાસમાં એક મેચમાં 50થી વધુનો સ્કોર અને 5 વિકેટ લેનારી પ્રથમ ખેલાડી બની છે. દીપ્તિ શર્માએ આ વર્લ્ડ કપમાં કુલ 22 વિકેટ લીધી હતી.
Android મોબાઇલ માટેઃ https://play.google.com/store/apps/details?id=com.gujaratpost.app
iOS મોબાઇલ માટેઃ https://apps.apple.com/in/app/gujarat-post/id6475000526+++