અમદાવાદઃ નરોડા પોલીસે પીસીઆર વાનના ઈન્ચાર્જ અને વાનમાં હાજર હોમગાર્ડ સામે એફઆઈઆર નોંધી છે. બંને પીસીઆર વાન દારૂની બોટલો અને રોકડ લઈને ફરતી હતી. નરોડા પોલીસે બંનેની ધરપકડ કરી કાયદેસરની કાર્યવાહી હાથ ધરી છે.
નરોડા પોલીસ સ્ટેશનમાં સર્વેલન્સ સ્કવોડના પોલીસકર્મી કિરણકુમાર બાબુજીએ નોંધાવેલી એફઆઈઆર મુજબ ઈન્ચાર્જ પોલીસ ઈન્સ્પેક્ટર દ્વારા સાંજના સમયે નરોડા પોલીસ લાઈન ગેટ પાસે ગેલેક્સી ચાર રસ્તા તરફ જતા રોડ પર મૌખિક માહિતી આપવામાં આવી હતી. નરોડા પોલીસ સ્ટેશનની પીસીઆર વાન નંબર 91માં મોબાઈલ વાનનો ઈન્ચાર્જ અને તેની સાથે કામ કરતો હોમગાર્ડ કોઈ જગ્યાએથી કાળી થેલી અને વિદેશી દારૂની બે બોટલ સાથે નીકળ્યો હતા. ત્યારબાદ પીસીઆર વાનમાં તપાસ કરતાં વાનમાંથી વિદેશી દારૂની બે બોટલો અને 30 હજાર રૂપિયા રોકડા મળી આવ્યાં હતા.
હોમગાર્ડે ભાગવાનો પ્રયાસ કર્યો
પીસીઆર વાનમાં હાજર પોલીસકર્મી સતીશ ઠાકુર અને હોમગાર્ડ વિક્રમ સિંહ રાજપૂતની ધરપકડ કરાઇ છે. વાનમાંથી દારૂની બોટલો અને રોકડ મળ્યાં બાદ પાછળની સીટ પર બેઠેલા હોમગાર્ડ વિક્રમ સિંહે કાળી થેલી લઈને વાહનમાંથી ભાગવાનો પ્રયાસ કર્યો હતો, પરંતુ સ્થળ પર હાજર પોલીસકર્મીઓએ તેને પકડી લીધો હતો. કોથળામાંથી વિદેશી દારૂની બે સીલબંધ બોટલો મળી આવતાં બંને પાસેથી પરમીટ માંગવામાં આવી હતી પરંતુ તેઓ તે આપી શક્યા ન હતા.
જ્યારે પોલીસકર્મીઓએ પૂછ્યું તો તેઓએ કહ્યું કે બંને હંસપુરા બ્રિજ પાસે ઉભા હતા, તે સમયે એક ઓટો રિક્ષા ચાલક શંકાસ્પદ હાલતમાં પસાર થઈ રહ્યો હતો, તપાસ કરતાં તેની પાસેથી દારૂની બોટલો મળી આવી હતી. બોટલો લઇને રિક્ષાચાલકને જવા દીધો હતો, પરંતુ તેમની પાસેથી મળી આવેલા રૂ.30,000 અંગે બંને કોઈ સંતોષકારક જવાબ આપી શક્યા ન હતા.
આ રોકડ ક્યાંથી આવી તે અંગે નરોડા પોલીસ તપાસ કરી રહી છે. ધરપકડ કરાયેલા બંને પોલીસ કર્મચારીઓએ અન્ય કોઈ ગુનો કર્યો હશે તો તે સંદર્ભે પણ એફઆઈઆર નોંધવામાં આવશે. હાલ પોલીસે બંને સામે પ્રોહિબિશન એક્ટ 65 (A) (A), 81, 116 (B) હેઠળ કાયદેસરની કાર્યવાહી હાથ ધરી છે.
અમારી મોબાઇલ એપ ડાઉનલોડ કરોઃ
Android મોબાઇલ માટેઃ https://play.google.com/store/
iOS મોબાઇલ માટેઃ https://apps.apple.com/in/app/
