ગાંધીનગરઃ ગુજરાત વિધાનસભાનું સત્ર ચાલી રહ્યું છે. ગુજરાતમાં યુનિફોર્મ સિવિલ કોડ એટલે કે સમાન નાગરિક સંહિતા લાગુ કરવાની તૈયારીઓ તેજ બની છે. માર્ચ મહિનાના અંતમાં બિલ આવી શકે છે. તો ગુજરાત વિધાનસભામાં પ્રશ્નોત્તરી કાળ દરમિયાન આમ આદમી પાર્ટીના ધારાસભ્ય ગોપાલ ઇટાલિયા અને ગૃહમંત્રી હર્ષ સંઘવી વચ્ચે ભારે દલીલો થઈ હતી.
ગોપાલ ઇટાલિયાએ પોતાની શૈક્ષણિક લાયકાત સ્પષ્ટ કરતા કહ્યું કે, હું માત્ર 8 પાસ નથી, મેં BA.LLB નો અભ્યાસ કર્યો છે. હું કાયદો ભણેલો હોવાથી મારી જાતને હોશિયાર સમજું છું, પણ કોઈને નીચા દેખાડીને મોટો બનવા નથી માંગતો. જેના પર ગૃહમંત્રી હર્ષ સંઘવીએ વળતો પ્રહાર કરતા કહ્યું, કોઈએ કદાચ ચોપડીઓ ઓછી વાંચી હોય તેવું બની શકે, પણ અમને અહીં કોઈની ઉપર જૂતું ફેંકવાનું શીખવવામાં આવતું નથી.
તાજેતરમાં મુખ્યમંત્રી ભૂપેન્દ્ર પટેલ અને હર્ષ સંઘવીએ દિલ્હીમાં કેન્દ્રીય નેતાઓ સાથે મુલાકાત કરી હતી, જેમાં UCC મુદ્દે ચર્ચા થઈ હોવાનું મનાય છે. જે બાદ ગુજરાતમાં યુનિફોર્મ સિવિલ કોડ (UCC) એટલે કે સમાન નાગરિક સંહિતા લાગુ કરવાની તૈયારીઓ તેજ બની છે. રાજ્ય સરકારે આ કાયદાના અભ્યાસ માટે નિવૃત્ત જજની અધ્યક્ષતામાં જે સમિતિ બનાવી હતી, તેનો અહેવાલ ટૂંક સમયમાં મળી શકે છે. રાજ્યમાં માર્ચના અંતમાં આ બિલ આવશે તેવી અટકળો થઈ રહી છે.
જો આ બિલ પસાર થઈ જાય, તો લગ્ન, છૂટાછેડા, મિલકતમાં વારસાઈ હક અને બાળક દત્તક લેવા જેવા વિષયોમાં તમામ ધર્મના લોકો માટે એક સમાન કાયદો અમલી બનશે. ઉત્તરાખંડ બાદ ગુજરાત આ કાયદો લાવનાર દેશનું મહત્વનું રાજ્ય બની શકે છે.
