બંને બેઠક પર શંકરસિંહ વાઘેલાની પાર્ટીને નોટાથી પણ ઓછા મત મળ્યાં
ગાંધીનગરઃ મહેસાણા કડી વિધાનસભાની પેટા ચૂંટણીમાં ભાજપે 39,452 મતની જંગી લીડથી વિજયની હેટ્રીક મારી હતી. ભાજપના રાજેન્દ્ર ચાવડાને 99,742 મત, જ્યારે હરીફ કોંગ્રેસના રમેશ ચાવડાને 60,290 મત મળ્યાં હતા. ભાજપે અઢી વર્ષ પહેલાં 2022ની ચૂંટણી 28,194 મતે જીતી હતી. ભાજપને 59.39 ટકા અને કોંગ્રેસને 35.90 ટકા મત મળ્યાં હતા. એટલે કે, કોંગ્રેસને ભાજપ કરતાં અધધ 23.48 ટકા મત ઓછા મળ્યાં હતા. આ સાથે ભાજપ અને કોંગ્રેસ સિવાયના આપ સહિત છ ઉમેદવારોની ડિપોઝિટ પણ ડૂલ થઇ હતી.
કડી સીટ પર ભાજપના ઉમેદવાર રાજેન્દ્રકુમાર ચાવડાને 99,742 મત, કોંગ્રેસના રમેશ ચાવડાને 60,290 મત મળ્યાં હતા. ત્રીજા ક્રમે રહેલી આમ આદમી પાર્ટીના ઉમેદવાર જગદીશ ચાવડાને 3090 મત મળ્યાં હતા. કડી બેઠક પર શંકરસિંહ વાઘેલાની પાર્ટી પ્રજાશક્તિ ડેમોક્રેટિક પાર્ટી ચોથા ક્રમે રહી હતી. અહીં તેમના ઉમેદવાર ડો. ગિરિશ કાપડીયાને માત્ર 1335 મત મળ્યાં હતા. જ્યારે નોટાને પણ શંકરસિંહની પાર્ટી કરતાં વધારે મત મળ્યાં હતા. કડીમાં 1701 ઉમેદવારોએ નોટાનું બટન દબાવ્યું હતું.
વિસાવદર બેઠક આમ આદમી પાર્ટીએ જાળવી રાખી હતી. અહીં આમ આદમી પાર્ટીના ઉમેદવાર ગોપાલ ઈટાલિયાએ ભાજપના કિરીટ પટેલને 17554 મતથી હરાવ્યા હતા. આપના ગોપાલ ઈટાલિયાને 75942 મત મળ્યાં હતા, ભાજપના કિરીટ પટેલને 58288 મત મળ્યાં હતા. ત્રીજા ક્રમે રહેતા કોંગ્રેસના નીતિન રાણપરીયાને 5501 મત મળ્યાં હતા. વિસાવદરમાં શંકરસિંહ વાઘેલાની પાર્ટીના ઉમેદવાર આઠમા ક્રમે રહ્યાં હતા. પ્રજા શક્તિ ડેમોક્રેટિક પાર્ટીના ઉમેદવાર કિશોર કાનકડને 479 મત મળ્યાં હતા.
નોટાને પણ અહીં તેનાથી વધારે મત મળ્યાં હતા. વિસાવદરમાં 1716 લોકોએ નોટાને મત આપ્યો હતો. વિસાવદરમાં આપને 51.04 ટકા મત મળ્યા હતા, જ્યારે ભાજપને 39.24 ટકા અને કોંગ્રેસને 3.7 ટકા મળ્યા હતા. અન્ય 13 ઉમેદવારોને 1 ટકાથી પણ ઓછા મત મળ્યા હતા.
Android મોબાઇલ માટેઃ https://play.google.com/store/apps/details?id=com.gujaratpost.app
iOS મોબાઇલ માટેઃ https://apps.apple.com/in/app/gujarat-post/id6475000526+++