અમદાવાદઃ લોકસભાની ચૂંટણીમાં લોકોની નજર 'આણંદ' બેઠક પર પણ ટકેલી છે. અહીંના જ્ઞાતિ સમીકરણો, ઉમેદવારો અને ક્ષત્રિયોએ આ લોકસભા બેઠકને હાઈપ્રોફાઈલ બનાવી છે. કેન્દ્રીય મંત્રી અને રાજકોટના ભાજપના ઉમેદવાર પરસોત્તમ રૂપાલાના 'રોટી-બેટી' અંગેના નિવેદનથી ક્ષત્રિય સમાજ રોષે ભરાયો છે. જો કે રૂપાલાએ માફી માગી લીધી હતી, પરંતુ ક્ષત્રિય સમાજે કહ્યું હતું કે તેમની માફી અહંકારથી ભરેલી છે. આણંદ બેઠક જે ભાજપ પાસે છે તે હવે રૂપાલા વિવાદમાં ફસાઈ છે.
આણંદમાં ક્ષત્રિયોની બુધવારે વિશાળ રેલી યોજાઈ હતી. જેમાં સમાજને એક સંદેશ આપવામાં આવ્યો હતો કે ED-CBIથી ડરવાની જરૂર નથી. સમાજના અગ્રણી પી.ટી.જાડેજાએ કહ્યું કે, ભાજપને મત આપશો નહીં. વડાપ્રધાન મોદી ગુરુવારે સવારે 11 વાગ્યે આણંદ પહોંચ્યાં હતા. તેમણે પણ એક વિશાળ રેલીને પણ સંબોધી હતી. ક્ષત્રિય સમાજની રેલીમાં શહેર ઉપરાંત આસપાસના ગામડાઓમાંથી મોટી સંખ્યામાં લોકો જોડાયા હતા. બીજી તરફ વડાપ્રધાન નરેન્દ્ર મોદીની રેલીમાં શહેરીજનોની સંખ્યા વધુ હતી. રેલી બે કલાક મોડી શરૂ થઈ હતી.
ગુજરાતમાં લાંબા સમયથી ક્ષત્રિયોએ ભાજપને સમર્થન આપ્યું છે. હવે જ્યારે રૂપાલાએ ખોટું નિવેદન આપ્યું છે ત્યારે પાર્ટી તેમને સમર્થન આપી રહી છે. ક્ષત્રિયોની એક જ માંગ હતી કે રૂપાલાને ચૂંટણી મેદાનમાંથી હટાવવા જોઈએ. ભાજપે આ માંગણી સ્વીકારી નથી. જેના કારણે રૂપાલાનો મામલો ક્ષત્રિય સમાજમાં ગંભીર બન્યો છે.
આ વિરોધ હવે દરેક ઘર સુધી પહોંચી ગયો છે. લોકો રેલીઓમાં આવી રહ્યાં છે. ભાજપના ઉમેદવારને ક્ષત્રિયોના વિરોધનો માર સહન કરવો પડી શકે છે, આણંદ લોકસભા બેઠક પર ભાજપ અને કોંગ્રેસ વચ્ચે ટક્કર છે. અહીં ભાજપના ઉમેદવાર મિતેશ પટેલ છે, જ્યારે કોંગ્રેસના ધારાસભ્ય અમિત ચાવડા લોકસભાના ઉમેદવાર છે.
કેન્દ્રીય મંત્રી પરસોત્તમ રૂપાલાએ ક્ષત્રિય સમાજ અંગે કરેલી ટિપ્પણીની અસર અન્ય બેઠકો પર પણ જોવા મળી રહી છે.આણંદ લોકસભા બેઠક પર ક્ષત્રિય સમાજ દ્વારા બુધવારે 'ક્ષત્રિય અસ્મિતા મહાસંમેલન'નું આયોજન કરવામાં આવ્યું હતું. ગ્રામ્ય વિસ્તારોમાં ક્ષત્રિય સમાજનું વર્ચસ્વ છે. કોંગ્રેસ પાર્ટીને આશા છે કે ક્ષત્રિય સમાજનો વિરોધ ચાવડાને જીત તરફ લઈ જશે. ભાજપે પાટીદાર સમાજના મિતેશ પટેલને મેદાનમાં ઉતાર્યા છે. આ વખતે ક્ષત્રિય સમાજનો વિરોધ ભાજપના ઉમેદવારનો રસ્તો મુશ્કેલ બનાવી શકે છે. 2019ના જનાદેશ પર નજર કરીએ તો આણંદ બેઠક પરથી ભાજપના ઉમેદવાર મિતેશ પટેલ 6,33,097 મતો મેળવીને જીત્યા હતા. તેમણે કોંગ્રેસના ઉમેદવાર ભરતસિંહ સોલંકીને લગભગ બે લાખ મતોના માર્જીનથી હરાવ્યાં હતા. સોલંકીને 4,35,379 મત મળ્યાં હતા.
અમારી મોબાઇલ એપ ડાઉનલોડ કરોઃ
Android મોબાઇલ માટેઃ https://play.google.com/store/
iOS મોબાઇલ માટેઃ https://apps.apple.com/in/app/
