અમેરિકામાં ગૌતમ અદાણી પર મોટો આરોપ, 265 મિલિયન ડોલરની લાંચને લઇને નવો ઘટસ્ફોટ

કંપની વિરુદ્ઘ નીકળ્યુું વોરંટ, અદાણીએ ફગાવ્યાં આરોપ

આ પ્રોજેક્ટમાં અમેરિકી ઇન્વેસ્ટર્સના પૈસા લાગ્યા હતા, જે મામલે કેસ દાખલ થયો

ભારતીય શેર બજારમાં મોટો કડાકો, અદાણીના શેરમાં પણ મોટો ઘટાડો 

નવી દિલ્હીઃ ભારતીય ઉદ્યોગપતિ અને અદાણી ગ્રુપના ચેરમેન ગૌતમ અદાણી પર અમેરિકામાં ગંભીર આરોપો લાગ્યાં છે. તેમની કંપનીના રોકાણકારો સાથે છેતરપિંડી કરવાના આરોપો છે. તેમના પર અમેરિકામાં પોતાની કંપની માટે કોન્ટ્રાક્ટ મેળવવા માટે 265 મિલિયન ડોલર લગભગ 2236 કરોડ રૂપિયાની લાંચ આપવાનો આરોપ છે. આ સમગ્ર મામલો અદાણી ગ્રુપની કંપની અદાણી ગ્રીન એનર્જી લિમિટેડ અને અન્ય એક પેઢી સાથે સંબંધિત છે.

અદાણી પર કયા આક્ષેપો થયા ?

યુએસમાં સિક્યોરિટીઝ એન્ડ એક્સચેન્જ કમિશન (SEC) એ બુધવારે આ કેસમાં ગૌતમ અદાણીના ભત્રીજા સાગર અદાણી, અદાણી ગ્રીન એનર્જી લિમિટેડના અધિકારીઓ અને અન્ય ફર્મ એઝ્યુર પાવર ગ્લોબલ લિમિટેડના એક્ઝિક્યુટિવ સિરિલ કેબનેસ સામે પણ આરોપો દાખલ કર્યા છે. અહેવાલમાં જણાવાયું છે કે ગૌતમ અદાણી અને તેમના ભત્રીજા સાગરે 7 અન્ય પ્રતિવાદીઓ સાથે તેમની રિન્યુએબલ એનર્જી કંપની માટે કોન્ટ્રાક્ટ મેળવવા અને ભારતના સૌથી મોટા સોલાર પાવર પ્લાન્ટ પ્રોજેક્ટને વિકસાવવા ભારતીય સરકારી અધિકારીઓને આશરે $265 મિલિયનની લાંચ ચૂકવી હતી.

2 બિલિયન ડૉલરના નફા સંબંધિત કેસ

એવો દાવો કરવામાં આવ્યો હતો કે આ સમગ્ર મામલો અબજો ડોલરના નફા સાથે સંબંધિત છે. ફરિયાદીઓએ આરોપ લગાવ્યો છે કે આ કોન્ટ્રાક્ટ દ્વારા અદાણી ગ્રુપને 20 વર્ષમાં $2 બિલિયનથી વધુનો નફો થવાની અપેક્ષા હતી. આ લાંચ 2020 થી 2024 વચ્ચે અધિકારીઓને આપવામાં આવી હતી.

આ નફા માટે અમેરિકા સહિત અન્ય દેશોના રોકાણકારો અને બેંકો સાથે ખોટું બોલવામાં આવ્યું હતું. અદાણી ગ્રીન એનર્જીના અન્ય એક્ઝિક્યુટિવ, ભૂતપૂર્વ CEO વિનીત જૈને ધિરાણકર્તાઓ અને રોકાણકારોથી તેમના ભ્રષ્ટાચારને છુપાવીને $3 બિલિયનથી વધુની લોન અને બોન્ડ એકત્ર કર્યા હતા.

ગૌતમ અદાણી આટલી સંપત્તિના માલિક

ભારતીય અબજોપતિ ગૌતમ અદાણી હાલમાં 85.5 અબજ ડોલરની સંપત્તિ સાથે વિશ્વના ટોચના ધનિક લોકોની યાદીમાં 18મા ક્રમે છે. છેલ્લા 24 કલાકમાં તેમને $295 મિલિયનનું નુકસાન થયું છે. જો આપણે તેમની કંપની અદાણી ગ્રીન એનર્જી લિમિટેડ વિશે વાત કરીએ તો તેનું માર્કેટ કેપિટલાઇઝેશન રૂ. 2.24 લાખ કરોડ છે.

અદાણી ગ્રીન શેર સ્ટેટસ

અમેરિકામાં આરોપોથી ઘેરાયેલી ગૌતમ અદાણીની કંપની અદાણી ગ્રીન એનર્જીના શેર પર નજર કરીએ તો ભારતીય શેરબજારમાં ઘટાડા વચ્ચે આ કંપનીના શેર પણ સતત ઘટી રહ્યા છે. છેલ્લા એક મહિનામાં તેની કિંમતમાં 17.76 ટકાનો ઘટાડો થયો છે અને મંગળવારે છેલ્લા ટ્રેડિંગ દિવસે તે 3 ટકાથી વધુ ઘટીને રૂ. 1407 પર બંધ થયો હતો.

અમારી મોબાઇલ એપ ડાઉનલોડ કરોઃ

Android મોબાઇલ માટેઃ https://play.google.com/store/apps/details?id=com.gujaratpost.app

iOS મોબાઇલ માટેઃ https://apps.apple.com/in/app/gujarat-post/id6475000526+++